PBS வோட க்ரஷ் இந்த நடிகையோட கணவர்தானாம்... போட்டுடைத்த நடிகை!

தொலைக்காட்சி செய்தி வாசிப்பாளராக திரையுலகில் இடம் பிடித்து, சமீப காலங்களில் முன்னணி தமிழ் நடிகைகளின் வரிசையில் இணைந்திருக்கும் பிரியா பவானி ஷங்கரின் ரகசிய காதல் பற்றிய தகவலை அவரே பகிர்ந்துள்ளார். செலிபிரிட்டி கிரஷ் என்று ஆங்கிலத்தில் சொல்லப்படும் இந்த ரகசிய காதலர் யார் என்பதை அவர் சமீபத்தில் கலந்து கொண்ட சினிமா நிகழ்ச்சி ஒன்றில் வெளிப்படையாக தெரிவித்துள்ளார்.

செய்தி வாசிப்பாளராக தொலைக்காட்சித்துறையில் அறிமுகமாகி ரசிகர்கள் இதயங்களை கொள்ளையடித்த பிரியா பவானி ஷங்கர், 'மேயாத மான்' படத்தின் மூலம் தமிழ் சினிமாவில் கதாநாயகியாக காலடி எடுத்து வைத்தார். இப்படம் வணிக ரீதியாக பெரும் வெற்றி பெற்றதுடன், பிரியாவின் நடிப்பு திறனுக்கும் நல்ல வரவேற்பை பெற்றுத்தந்தது.

இதையடுத்து, 'கடைக்குட்டி சிங்கம்', 'மான்ஸ்டர்', 'கசடதபற', 'ஓ மணப்பெண்ணே' 'பத்து தல' உள்ளிட்ட படங்களில் நடித்து புகழின் உச்சத்தை தொட்டார். தமிழ் திரையுலகில் தனக்கென தனி ரசிகர் பட்டாளத்தை உருவாக்கிக் கொண்டார்.

'ருத்ரன்' தந்த திருப்புமுனை

தொடர்ச்சியாக வெற்றிப் படங்களில் நடித்துவந்த பிரியா பவானி ஷங்கருக்கு, 'ருத்ரன்' படம் ஒரு பெரிய திருப்புமுனையாக அமைந்தது. துடிப்பான, புத்திசாலித்தனமான பெண்ணாக அவர் ஏற்றிருந்த கதாபாத்திரமும், நடிப்பு பார்வையாளர்களை வெகுவாக கவர்ந்தது. 'பத்து தல' படத்தில் அவர் துணிச்சலான காவல்துறை அதிகாரியாக நடித்து நல்ல பாராட்டைப் பெற்றார்.

எதிர்பார்ப்பை ஏற்படுத்தும் படங்கள்

தற்போது, கமல்ஹாசனின் 'இந்தியன் 2', 'டிமான்டி காலனி 2', ஜீப்ரா உட்பட பல படங்களில் பிரியா பவானி ஷங்கர் நடித்து வருகிறார். இந்தப் படங்கள் அனைத்தும் பெரும் எதிர்பார்ப்புடன் காத்திருக்கின்றன. இவை மூன்றுமே இந்த ஆண்டு ரிலீஸ் ஆகும் என்று எதிர்பார்க்கப்படும் படங்கள் என்பதால், பிரியா பவானிஷங்கர் தமிழ் சினிமாவில் நல்ல நிலைமையை அடைவார் என்று எதிர்பார்க்கப்படுகிறது.

மனம் திறந்த பிரியா

சமீபத்தில் ஒரு பொழுதுபோக்கு நிகழ்ச்சியில் பங்கேற்ற பிரியா பவானி ஷங்கர் தனக்கு நீண்ட காலமாக ஒருவர் மீது ரகசிய காதல் இருப்பதாக பகிர்ந்து கொண்டார். ரசிகர்களை ஆச்சரியத்தில் ஆழ்த்திய இந்த தகவலின் தொடர்ச்சியாக தற்போது அந்த காதல் நாயகன் யார் என்ற கேள்விகள் விஸ்வரூபம் எடுத்துள்ளன. பொதுவாக செலிபிரிட்டிகளாக இருந்தாலும், அவர்களுக்கு என்று ஒரு கிரஷ் இருப்பார்கள். அவர்களைப் பற்றி பொதுவாக யாரும் வெளியே சொல்லமாட்டார்கள். ராஷ்மிகா மந்தனா ஒரு பேட்டியில் தளபதி விஜய் மீது தனக்கு ரகசிய காதல் இருந்ததாகவும் அது செலிபிரிட்டி கிரஷ் என்றும் தெரிவித்திருந்தார்.

பாலிவுட் நாயகனாம்!

தனது கிரஷ் பிரபல பாலிவுட் நடிகர் விக்கி கௌசல்தான் என்றும், அவர் ஏற்கனவே நடிகை கத்ரீனா கைஃபை திருமணம் செய்து கொண்டவர் என்றும் பிரியா பகிரங்கமாக தெரிவித்துள்ளார். பிரியாவின் இந்த திடீர் காதல் வாக்குமூலம் திரையுலக வட்டாரங்களில் பெரும் பரபரப்பை ஏற்படுத்தியுள்ளது.

வளர்ச்சியின் பாதையில்

திரையுலகில் படிப்படியாக, ஆனால் சீராக முன்னேறி வரும் நடிகையான பிரியா பவானி ஷங்கரின் திரைப்படங்கள் இந்த ஆண்டு தொடர்ந்து வெளிவர இருக்கின்றன. எதிர்காலத்தில் தமிழ் சினிமாவின் முன்னணி நாயகிகளில் ஒருவராக அவர் ஜொலிப்பது உறுதி.