ஆயுஷ்மான் பாரத்: அனைவருக்கும் மலிவான மருத்துவம்

இந்தியா போன்ற வளரும் நாட்டில் மலிவான மற்றும் தரமான மருத்துவ வசதி கிடைப்பது என்பது இன்னமும் சவாலாகவே உள்ளது. அரசு மருத்துவமனைகளில் இலவச சேவைகள் இருந்தாலும், வசதிகள் மற்றும் மருத்துவர்களின் எண்ணிக்கைக் குறைபாடு காரணமாகத் தனியார் மருத்துவமனைகளை நாடும் நிலைக்கு மக்கள் தள்ளப்படுகின்றனர். இது பெரும்பாலான ஏழை மற்றும் நடுத்தர வர்க்கத்தினரால் தாங்க முடியாத சுமையாகிறது. இத்தகைய சூழலை மாற்ற இந்திய அரசு ஆயுஷ்மான் பாரத் திட்டத்தைத் தொடங்கியுள்ளது.

ஆயுஷ்மான் பாரத் யோஜனா என்றால் என்ன?

ஆயுஷ்மான் பாரத் யோஜனா என்பது, நாட்டின் ஏழை மற்றும் நலிந்த பிரிவினருக்கு ஆண்டுக்கு 5 லட்சம் ரூபாய் வரை காப்பீட்டுடன் கூடிய இலவச மருத்துவ வசதியை வழங்கும் மத்திய அரசின் திட்டமாகும். இந்தத் திட்டம் தேசிய சுகாதார பாதுகாப்பு முகமை (National Health Authority - NHA) மூலம் செயல்படுத்தப்படுகிறது. இந்தியாவில் உள்ள ஏழைகள் மற்றும் பொருளாதாரத்தில் பின்தங்கிய நிலையில் உள்ள சுமார் 10 கோடி குடும்பங்கள் இத்திட்டத்தின் கீழ் பயனடைகின்றன.

ஆன்லைனில் விண்ணப்பிப்பது எப்படி?

ஆயுஷ்மான் பாரத் அட்டைக்கு ஆன்லைனில் நீங்களே விண்ணப்பிக்கலாம். இது முற்றிலும் இலவசம். இதற்கான வழிமுறைகள்:

அதிகாரப்பூர்வ இணையதளம்: பிரதான் மந்திரி ஜன் ஆரோக்கிய யோஜனா (PMJAY) இன் அதிகாரப்பூர்வ இணையதளமான (https://pmjay.gov.in/) செல்லவும்.

தகுதிச் சரிபார்ப்பு: "Am I Eligible" என்ற பகுதியை சொடுக்கி, உங்கள் செல்போன் எண் மற்றும் ரேஷன் அட்டை விவரங்கள் மூலம் உங்கள் குடும்பம் தகுதியுடையதா எனச் சரிபார்த்துக் கொள்ளுங்கள்.

விண்ணப்பப் படிவம்: தகுதியுடையவராக இருந்தால், பதிவு செய்யும் பகுதிக்குச் சென்று தேவையான ஆவணங்கள் (ஆதார் அட்டை, குடும்ப அட்டை போன்றவை) மூலம் விண்ணப்பப் படிவத்தைப் பூர்த்தி செய்யவும்.

ஆயுஷ்மான் பாரத் அட்டையின் பயன்கள்

அரசு மற்றும் இத்திட்டத்தில் இணைந்துள்ள தனியார் மருத்துவமனைகளில் முற்றிலும் கட்டணமில்லாமல் மருத்துவச் சிகிச்சை.

மருத்துவமனையில் அனுமதிக்கப்படுவதற்கு முந்தைய மற்றும் பின்னரான செலவுகளும் இத்திட்டத்தில் அடக்கம்.

பரிசோதனைகள், மருந்துகள், அறுவை சிகிச்சைகள் என ஆண்டுக்கு குடும்பம் ஒன்றுக்கு ரூ.5 லட்சம் வரை காப்பீட்டுத் தொகை.

தகுதி யாருக்கு உண்டு?

கிராமப்புறங்களில் வறுமைக்கோட்டுக்குக் கீழ் உள்ள குடும்பங்கள், குறிப்பிட்ட சாதியினர் (SC/ST), நிலமற்ற தொழிலாளர்கள் ஆகியோர் தகுதியுடையவர்கள்.

நகர்ப்புறங்களில் தெருவோர வியாபாரிகள், பிச்சைக்காரர்கள், ரிக்ஷா ஓட்டுநர்கள், கட்டுமானத் தொழிலாளர்கள் போன்ற 11 குறிப்பிட்ட தொழில் பிரிவினர் தகுதி பெறுவார்கள்.

தகுதியைச் சரிபார்ப்பு

ஆயுஷ்மான் பாரத் இணையதளத்திற்குச் சென்று உங்கள் தகுதியைச் சரிபார்த்துக் கொள்ளலாம். அருகிலுள்ள பொது சேவை மையங்களில் (CSC) சென்று சரிபார்ப்பதும் எளிது. அங்கு உங்களுக்கு ஆயுஷ்மான் பாரத் அட்டை பெறவும் உதவுவார்கள்.

ஆயுஷ்மான் பாரத் அட்டையை மொபைலில் வைத்திருப்பது எப்படி?

ஆயுஷ்மான் பாரத் அட்டையை மொபைலில் பதிவிறக்கம் செய்து வைத்துக்கொள்ளும் வசதியும் உள்ளது. இதற்கு 'ஆயுஷ்மான் பாரத் ஹெல்த் அக்கவுண்ட்' (ABHA ) எனும் மொபைல் செயலியைப் பயன்படுத்தலாம்.

முக்கியக் குறிப்பு

ஆயுஷ்மான் பாரத் அட்டைக்கு விண்ணப்பிப்பது அல்லது பெறுவது தொடர்பாக, கட்டணம் செலுத்த வேண்டியதில்லை. இச்சேவை இலவசம் என்பதை நினைவில் கொள்ளுங்கள். எவரேனும் இதற்குக் கட்டணம் கேட்டால் அருகிலுள்ள காவல் நிலையத்தில் புகார் அளிக்கவும்.

விமர்சனங்களும் சவால்களும்

எந்த ஒரு அரசுத் திட்டத்தையும் போல ஆயுஷ்மான் பாரத் மீதும் விமர்சனங்கள் உண்டு. இத்திட்டத்தில் இணைவதற்கான தகுதிகள் மிகவும் கடுமையாக இருப்பதாகச் சிலர் விமர்சிக்கின்றனர். மேலும், சில நேரங்களில் காப்பீட்டுத் தொகையில் மோசடிகள் நடப்பதாகவும் புகார்கள் உள்ளன. ஆனால், ஒட்டுமொத்தமாகப் பார்க்கும்போது நலிவடைந்த பிரிவினருக்கு இத்திட்டம் பேருதவியாக இருப்பது மறுக்கவியலாத உண்மை.

தமிழ்நாட்டில் ஆயுஷ்மான் பாரத்

தமிழ்நாட்டில் முதலமைச்சரின் காப்பீட்டுத் திட்டம் போன்ற மாநில அரசின் சுகாதாரத் திட்டங்கள் இருந்தாலும் கூட, ஆயுஷ்மான் பாரத் திட்டம் கூடுதல் பயன்களைத் தருகிறது. தொலைதூரப் பகுதிகளில் உள்ளவர்களும், குறிப்பிட்ட மருத்துவ வசதி தமிழ்நாட்டில் இல்லாத பட்சத்தில் வேறு மாநிலங்களில் உள்ள மருத்துவமனைகளிலும் இத்திட்டத்தின் மூலம் சிகிச்சை பெற முடியும் என்பது குறிப்பிடத்தக்கது.

இந்தியாவின் சுகாதாரக் கனவு

விலையுயர்ந்த மருத்துவச் சிகிச்சை என்பது ஏழைகளுக்கு எட்டாக் கனியாக இருந்த நிலையை ஆயுஷ்மான் பாரத் திட்டம் வெகுவாக மாற்றியுள்ளது. அரசு மற்றும் தனியார் மருத்துவமனைகளிடையே ஆரோக்கியமானப் போட்டியை இத்திட்டம் உருவாக்கி வருகிறது. இந்தியாவில் மலிவான, தரமான சுகாதாரம் அனைவருக்கும் கிடைக்கும் என்பதை உறுதிசெய்ய இதுபோன்ற மக்கள் நலத் திட்டங்கள் தொடர்வது அவசியம்.