அந்தியூரில் ரூ.7.04 லட்சத்துக்கு வாழைத்தார் ஏலம்

அந்தியூர் கூட்டுறவு சங்கத்தில் ரூ.7.04 லட்சத்துக்கு வாழைத்தார் ஏலம் போனது.

ஈரோடு மாவட்டம் அந்தியூர் புதுப்பாளையம் வேளாண்மை உற்பத்தியாளர் கூட்டுறவு சங்கத்தில் வாரந்தோறும் செவ்வாய்க்கிழமை மற்றும் சனிக்கிழமை ஆகிய 2 நாட்கள் வாழைத்தார் ஏலம் நடைபெறுவது வழக்கம். அதன்படி, சனிக்கிழமை (நேற்று) என்பதால் வாழைத்தார் ஏலம் நடைபெற்றது.

இந்த ஏலத்துக்கு அந்தியூர், வெள்ளித்திருப்பூர், சென்னம்பட்டி, ஜரத்தல், ஒலகடம், அத்தாணி, ஆப்பக்கூடல் உள்பட பல்வேறு பகுதிகளில் இருந்து ஏராளமான விவசாயிகள் 4 ஆயிரத்து 220 வாழைத்தார்களை விற்பனைக்காக கொண்டு வந்திருந்தனர்.

இதில் கதலி வாழைப்பழம் கிலோ ஒன்று 18 ரூபாய்க்கும், நேந்திரம் 22 ரூபாய்க்கும் விற்பனை ஆனது. பூவன் (தார் ஒன்று) ரூ.450-க்கும், செவ்வாழை ரூ.580-க்கும், தேன்வாழை ரூ.490-க்கும், மொந்தன் ரூ.340-க்கும், ராஸ்தாளி ரூ.420-க்கும், பச்சை வாழை ரூ.330-க்கும் என மொத்தம் வாழைப்பழத்தார் ரூ.7 லட்சத்து 4 ஆயிரத்து 300க்கு ஏலம் போனது.

இதில், ஈரோடு, பெருந்துறை, சத்தியமங்கலம், கோவை, மேட்டுப்பாளையம் உள்பட பல்வேறு பகுதிகளைச் சேர்ந்த வியாபாரிகள் வாழைப்பழத்தார்களை ஏலம் எடுத்து சென்றனர்.