நாமக்கல் மாவட்ட தபால் அலுவலகங்களில் தங்கப் பத்திரம் விற்பனை துவக்கம்

Gold Bond Sales In Post Office

நாமக்கல் கோட்ட தபால்துறை கண்காணிப்பாளர் ரவிச்சந்திரன் வெளியிட்டுள்ள அறிக்கையில் கூறியுள்ளதாவது:

நாமக்கல் கோட்டத்தில் உள்ள அனைத்து தபால் அலுவலகங்களிலும், தங்க பத்திரங்கள் விற்பனை செய்யப்பட்டு வருகிறது . ஒருவர் ஒரு கிராம் முதல் 4,000 கிராம் வரை வாங்கலாம். தங்க பத்திரத்தின் முதலீட்டு காலம் 8 ஆண்டுகள் ஆகும். 8 ஆண்டுகள் இறுதியில் அன்றைய தேதியில் உள்ள மதிப்பில் தங்க பத்திரங்களை பணமாக மாற்றிக்கொள்ளலாம் . தேவைப்பட்டால் 5 ஆண்டுகள் முடிந்த பிறகு தங்க பத்திரத்தை பணமாக மாற்றிக்கொள்ளலாம். இந்த திட்டம் ஒரு நீண்ட கால சேமிப்பு திட்டம் ஆகும். இந்த திட்டத்தின் மூலம் செய்யப்படும் முதலீட்டிற்கு மத்திய ரிசர்வ் வங்கியின் மூலம் 2.5% ஆண்டு வட்டி கணக்கிட்டு ஒவ்வொரு ஆறு மாதத்திற்கும் முதலீட்டாளர்களின் வங்கி கணக்கில் வரவு வைக்கப்படும் . இது தங்க பத்திர முதலீட்டாளர்களுக்கு கிடைக்கும் கூடுதல் வருவாய் ஆகும் . இந்த திட்டம் 12.02.2024 முதல் 16.02.2024 வரை அனைத்து தபால் அலுவகங்களிலும் செயல்படும் . இதில் தங்கத்தின் விலை கிராமுக்கு ரூ 6,263 என நிர்ணயிக்கப்பட்டுள்ளது. அஞ்சலகங்களில் தங்க பத்திரத்தில் பணம் செலுத்துபவர்களுக்கு அஞ்சலக ரசீது வழங்கப்படும். சுமார் 20 நாட்களுக்கு பிறகு தங்க பத்திரம் வழங்கப்படும்.

முதலீடு செய்ய விரும்புபவர்கள் அருகிலுள்ள தபால் அலுவலகத்தை தொடர்புகொள்ளலாம். அவ்வாறு அலுவலகம் செல்ல இயலாதவர்கள் கீழ்க்கண்ட செல்போன் மூலம் அழைத்தால் உங்கள் வீடு தேடி சேவை அளிக்கப்படும். விருப்பமுள்ளவர்கள் 9488434443, 9042855559, ஆகிய செல்போன் எண்களை தொடர்புகொள்ளலாம். இதில் முதலீடு செய்ய முதலீடு செய்பவரின் ஆதார் எண்., பான் கார்டு மற்றும் வங்கி கணக்கு மிக மிக அவசியம். கடந்த 2015 ஆம் ஆண்டு தங்கப் பத்திர திட்டத்தில் 100 கிராம் ரூ. 2,68,400 முதலீடு செய்த முதலீட்டாளர்களுக்கு எட்டு ஆண்டுகள் முடிந்து ரூ. 6,13,200 முதிர்வுத் தொகை அவர்களுடைய வங்கி கணக்கில் நேரடியாக வரவு வைக்கப்பட்டது. கூடுதலாக அவர்களுக்கு ரூ.53,680 வட்டியாக வழங்கப்பட்டுள்ளது. எனவே பொதுமக்கள் அதிக லாபம் தரக்கூடிய தங்கப் பத்திர திட்டத்தில் முதலீடு செய்து பயன்பெறலாம் என தெரிவிக்கப்பட்டுள்ளது.