தென்னையில் அதிக மகசூல் பெற ஊட்டச்சத்து டானிக்: விவசாயிகளுக்கு பயிற்சி

நாமக்கல் வட்டார வேளாண்மை மற்றும் உழவர் நலத்துறையின் சார்பில், மரூர்ப்பட்டி கிராமத்தில், தென்னையில் அதிக மகசூல் பெற, தமிழ்நாடு வேளாண்மை பல்கலைக்கழகத்தால் அறிமுகப்படுத்தப்பட்டுள்ள தென்னை டானிக் பயன்படுத்தும் முறை குறித்து, விவசாயிகளுக்கு செயல் விளக்க பயிற்சி முகாம் நடைபெற்றது. நிகழ்ச்சிக்கு வட்டார வேளாண்மை உதவி இயக்குனர் சித்ரா தலைமை வகித்தார். வேளாண் அலுவலர் மோகன். முன்னிலை வகித்தார். முசிறி எம்ஐடி வேளாண்மை கல்லூரி மாணவர்கள் நிகழ்ச்சியில் கலந்து கொண்டு, தென்னை டானிக் பயன்படுத்தும் முறை மற்றும் அதன் பயன்கள் குறித்து விவசாயிகளுக்கு செயல் விளக்க பயிற்சி அளித்தனர்.

தென்னை வேரில் படும்படி டானிக்கை பயன்படுத்துவதால், பச்சையம் அதிகரித்தல், ஒளிச்சேர்க்கை திறன் கூடும், குரும்பை கொட்டுதல் குறையும், தேங்காய் பருப்பின் எடை கூடும், மகசூல் 20 சதவீதம் வரை அதிகரிக்கும். நோய் எதிர்ப்பு சக்தி அதிகரிக்கும். இந்த ஊட்டச்சத்து டானிக்கை 6 மாதங்களுக்கு ஒரு முறை தென்னை மரத்துக்கு அளிப்பதால் கூடுதல் பலன் கிடைக்கும் என விவசாயிகளுக்கு செயல் விளக்கம் அளிக்கப்பட்டது. முகாமில் துணை வேளாண் அலுவலர் ராமசாமி, மற்றும் முன்னோடி விவசாயிகள் கலந்து கொண்டனர்.