குற்றால அருவிகளில் 3வது நாளாக நீடிக்கும் வெள்ளப்பெருக்கு: சேதமடைந்த மெயின் அருவி

மேற்கு தொடர்ச்சி மலைப் பகுதிகளில் தொடர்மழையால் 3வது நாளாக நீடிக்கும் வெள்ளப்பெருக்கினால் மெயின் அருவி பகுதிகள் சேதமடைந்தன.

வானிலை ஆய்வு மையம் தென்காசி உட்பட தமிழகத்தின் தென் மாவட்டங்களுக்கு கன மழைக்கான ரெட் அலர்ட் கொடுக்கப்பட்டுள்ள நிலையில் கடந்த இரண்டு நாட்களாக மாவட்டத்தில் பல்வேறு இடங்களில் தொடர் மழை பெய்து வருகிறது.

இந்நிலையில் மாவட்டத்தின் மேற்கு தொடர்ச்சி மலை பகுதியில் அமைந்திருக்கும் குற்றால அருவிகளில் நேற்று முன்தினம் முதல் நீர்வரத்து அதிகரித்து வெள்ளப்பெருக்கு ஏற்பட்ட நிலையில் சுற்றுலா பயணிகள் பாதுகாப்பு கருதி தடை விதிக்கப்பட்டது.

கடந்த திங்கட்கிழமை இரவு தொடங்கி நேற்று முழுவதும் குற்றால அருவிகளில் காட்டாற்று வெள்ளம் ஏற்பட்ட நிலையில் நேற்று இரவு முதல் மழையின் தாக்கம் குறைந்ததால் தற்போது குற்றால அருவிகளில் வெள்ளப்பெருக்கு படிப்படியாக குறைய தொடங்கியுள்ளது.

மெயின் அருவி பகுதியில் ஏற்பட்ட காட்டாற்று வெள்ளப்பெருக்கினால் மெயின் அருவி மேல் பகுதியில் இருந்து மரத்துண்டுகள், பாறைகள் மற்றும் மண் அடித்து வரப்பட்டுள்ளது. மேலும் அருவி பகுதியில் அமைக்கப்பட்டிருந்த சுவர் மற்றும் தரை கல்களும் சேதம் அடைந்து காணப்படுகிறது.

தற்போது வெள்ளப்பெருக்கு படிப்படியாக குறைய தொடங்கியுள்ளன. முற்றிலும் குறைந்த பின்னர் அருவிப்பகுதி சுத்தம் செய்யப்பட்டு பொதுமக்கள் குளிக்க அனுமதிக்கப்படுவர் என கூறப்படுகிறது.