திருப்பூரில் மழை பெய்ய வேண்டி இஸ்லாமிய மக்கள் சிறப்பு தொழுகை

Tirupur News,Tirupur News Today- மழை பெய்ய வேண்டி தமிழ்நாடு தவ்ஹீத் ஜமாத் சாா்பில் இஸ்லாமியா் நேற்று (ஞாயிற்றுக்கிழமை) சிறப்பு தொழுகையில் ஈடுபட்டனா்.

தமிழகத்தில் கோடை வெயிலின் தாக்கம் நாளுக்குநாள் அதிகரித்து வருவதால், மக்கள் அவதியடைந்து வருகின்றனா்.

இந்நிலையில், மதியம் 12 மணி முதல் நண்பகல் 3 மணி வரை மக்கள் தேவையின்றி வெளியே வர வேண்டாம் என சுகாதாரத் துறை அறிவுறுத்தியுள்ளது.

திருப்பூா் மாவட்டத்தில் கடந்த சில நாள்களாக 100 டிகிரிக்கும் மேல் வெயில் பதிவாகி வருகிறது. இந்நிலையில் வரும் மே 4 முதல் 28 வரை அக்னி நட்சத்திரம் வெயில் வருகிறது.

இந்நிலையில், தமிழ்நாடு தவ்ஹீத் ஜமாத் சாா்பில், மழை பெய்ய வேண்டி திருப்பூா் பெரிய கடை வீதியில் உள்ள நொய்யல் மாநகராட்சிப் பள்ளியில் இஸ்லாமியா்கள் நேற்று, ஞாயிற்றுக்கிழமை சிறப்பு தொழுகையில் ஈடுபட்டனா்.

இது குறித்து தவ்ஹீத் ஜமாத் நிா்வாகிகள் கூறியதாவது,

மழை இல்லாத காலத்தில் மழை வேண்டி பொதுமக்கள் நபிகள் நாயகத்திடம் கோரிக்கை வைத்தபோது, அவா் மழை வேண்டி பிராா்த்தனை நடத்தினாா். அதை உணா்த்தும் வகையிலும், நினைவுகூறும் வகையிலும் இந்த தொழுகை நடத்தப்பட்டது.

தொழுகையின் சிறப்பம்சமாக சட்டையின் உள்புறத்தை மாற்றி, வெளிப்புறமாகப் போட்டு தொழுகை நடத்தினோம். வழக்கமாக தொழுகையில் ஈடுபடும்போது கைகள் வானத்தை நோக்கி இருக்கும், இன்றைக்கு கைகளை பூமியை நோக்கிவைத்து தொழுகை நடத்தினோம் என்றனா்.

இந்நிகழ்ச்சியில், தமிழ்நாடு தவ்ஜீத் ஜமாத் மாவட்டச் செயலாளா் யாசா் அராபத், துணைத் தலைவா் ஜாகிா் அப்பாஸ், துணைச் செயலாளா்கள் காஜா பாய், ஹனிபா, மருத்துவ அணி செயலாளா் நியாஸ் உள்ளிட்டோா் பங்கேற்றனா்.